ഒഴിവ് സമയം ഉല്ലാസകരവും രസകരവുമാക്കാന്‍ ഏറ്റവും നല്ല വഴികളിലൊന്നാണ് ഗാര്‍ഡനിങ്. ഇത് നിങ്ങള്‍ക്കും വീടിനും ഒരു പോലെ ഉന്മേഷം പകരും. ഓരോരുത്തരുടേയും താല്‍പര്യം പോലെ പച്ചക്കറിത്തോട്ടമോ പൂന്തോട്ടമോ നട്ടുപിടിപ്പിക്കാം.
പൂന്തോട്ട നിര്‍മ്മാണത്തിന്‍റെ ആദ്യഘട്ടം അല്‍പ്പം മടുപ്പുണ്ടാക്കുന്നതാണെങ്കിലും സ്വയം നട്ട ചെടി പൂത്തിരിക്കുന്നത് കണ്ടാല്‍ അത് വരെ തോന്നിയ എല്ലാ വിഷമവും പോകുമെന്ന് ഉറപ്പല്ലേ. ഇത് തന്നെയാണ് പൂന്തോട്ടത്തിന്‍റെ ഏറ്റവും വലിയ ഗുണവും. മാനസികവും ശാരീരികവുമായ ഉന്മേഷം പകരുന്നതാണ് പൂന്തോട്ടം.
ലാന്‍റ്സ്കേപ്പിങ്ങ് ഗാര്‍ഡനിങ്ങിന്‍റെ കാലമാണിപ്പോള്‍. ഇന്‍ഫോര്‍മല്‍ ഗാര്‍ഡന്‍, ഡ്രൈ ഗാര്‍ഡന്‍, കണ്ടംപ്രറി ഗാര്‍ഡന്‍ എന്നിങ്ങനെ പലതരത്തില്‍ പ്രകൃതിയ്ക്ക് അനുയോജ്യമായ തരത്തിലാണ് ഇന്ന് പൂന്തോട്ടങ്ങള്‍ ഒരുക്കുന്നത്. വീടിന്‍റെ മുന്‍ഭാഗത്ത് പച്ചപുല്ലുകള്‍ പാകി മീന്‍കുളമൊരുക്കുന്നത് പഴയ ഫാഷനാണെങ്കിലും മലയാളിയ്ക്കിന്നും ഇതിനോടുള്ള പ്രിയം അത്ര വിട്ടുമാറിയിട്ടില്ല.
പൂന്തോട്ടം ഒരുക്കാന്‍ തയാറെടുക്കും മുമ്പ് ചിലവാക്കാന്‍ ഉദ്ദേശിയ്ക്കുന്ന തുക, സ്ഥല വിസ്തൃതി ഇവ ആദ്യമേ കണക്കാക്കണം. പരിസ്ഥിതിയ്ക്ക് കോട്ടം തട്ടാത്തതും കാലാവസ്ഥയ്ക്ക് അനയോജ്യമായതുമായ ചെടികളും മരങ്ങളും വേണം നട്ടുപിടിപ്പിയ്ക്കാന്‍.
പുല്‍ത്തകിടി തയാറാക്കുന്നതിനായി ചതുരാകൃതിയിലുള്ള കാര്‍പ്പെറ്റ് പുല്‍മാറ്റുകള്‍ ഉപയോഗിയ്ക്കുക. ഇവ ഒരു ചതുരശ്ര അടി മാറ്റിന് 4045 രൂപവരെ നിരക്കില്‍ വിപണിയില്‍ ലഭ്യമാണ്. പുല്‍ത്തകിടികളില്‍ പച്ചപ്പ് നിലനിര്‍ത്തുന്നതിനായി പുല്ല് വെട്ടി വൃത്തിയാക്കിയ ശേഷം മഗ്നീഷ്യം സള്‍ഫേറ്റ് ലായനി തളിച്ച് കൊടുത്താല്‍ മതിയാകും.
പൂന്തോട്ടങ്ങളുടെ മാറ്റുകൂട്ടുവാനായി പാറക്കെട്ടുകളും വെള്ളച്ചാട്ടങ്ങളും ഒരുക്കാവുന്നതാണ്. പാറക്കല്ലുകള്‍, ബബിളുകള്‍, ബേബിചിപ്സ് തുടങ്ങിയവ ഉപയോഗിച്ച് കലാപരമായി പൂന്തോട്ടങ്ങളുടെ ഭംഗി കൂട്ടാനാകും. വീടിനു പുറത്ത് സ്ഥലം കുറവാണെങ്കില്‍ മനോഹരമായ ലാന്‍റ്സ്കേപ്പിങ്ങ് ടെറസിലോ, ബാല്‍ക്കണിയിലോ, അകത്തുള്ള കോര്‍ട്ട്യാഡിലോ ഒരുക്കാവുന്നതാണ്.
ലാന്‍റ്സ്കേപ്പിന്‍റെ പിരിമിതി ചെറുതായാലും കൃത്യമായ പരിചരണം നടന്നെങ്കില്‍ മാത്രമേ സൗന്ദര്യം നിലനിര്‍ത്താന്‍ സാധിയ്ക്കുകയുള്ളു. ശാരീരികവും മാനസികവുമായ ഉന്മേഷത്തിന് വീട്ടിലൊരു പൂന്തോട്ടം ഒരുക്കുന്നത് ഏറെ ഗുണകരമാകും.
മഴയും വെയിലുമേറ്റ് നശിക്കാത്ത കുഞ്ഞന്‍ പൂന്തോട്ടം എങ്ങനുണ്ടാവും?
വീടിനുളളില്‍ വളര്‍ത്താവുന്ന കുപ്പിക്കുള്ളിലെ പൂന്തോട്ടം അല്‍പ്പം കൗതുകം പകരുമെന്ന് മാത്രമല്ല വീടിന്‍റെ ഭംഗി വര്‍ദ്ധിപ്പിക്കുകയും ചെയ്യും. വളരെ എളുപ്പത്തില്‍ ഒരുക്കാവുന്നതാണ് കുഞ്ഞന്‍ പൂന്തോട്ടങ്ങള്‍.
അല്‍പ്പം വിസ്താരമുളള കുപ്പികള്‍കണ്ടെത്തി വീട്ടിലെ പ്രിയപ്പെട്ട സ്ഥലത്തു വയ്ക്കാം. വായു സഞ്ചാരം കൂടിയ കുപ്പികളാവും കൂടുതല്‍ നല്ലത്. കുറച്ച് കല്ലുകളും മണലുമുപയോഗിച്ച് കുപ്പിക്കുളളില്‍ ചെറിയ പ്രതലം നിര്‍മ്മിച്ചെടുക്കണം.അതിന്‍റെ മുകളില്‍ അല്പം മണ്ണും കരിയും കൂടി വിതറിയാല്‍ ദുര്‍ഗന്ധവും ഒഴിവാക്കാം. ഇതിലേക്ക് കുറച്ച് പായല്‍ കൂടി ഇട്ടാല്‍ പ്രതലം തയ്യാറായി. ചെറിയ ഉയരത്തില്‍ വളരുന്ന ചെടികളുടെ വിത്തുകള്‍ നീളമുളള കമ്പുകളുടെ സഹായത്തോടെ വച്ചു പിടിപ്പിക്കാം.
